សូមគោរពអ្នកដទៃ និង ស្មោះត្រង់

តាំងខ្លួនជាអ្នកប្រជាធិបតី យើងត្រូវប្រតិបត្តិ និង គោរពគោលការណ៍ប្រជាធិបតី ។ យើងទាំងអស់គ្នាដឹងច្បាស់ហើយថា មនុស្សខុសៗគ្នា តែងតែមានគំនិតខុសៗពី បើនិយាយឲ្យល្អិតល្អន់ទៅ សូម្បីតែខ្លួនយើងម្នាក់ឯងក៏គំនិតផ្លាស់ប្ដូរពីវិនាទីនេះ ទៅ វិនាទីនោះមិនឈប់ឈរឡើយ (សូមមិននិយាយដល់អារ្យជនដែលគ្រប់គ្រងចិត្តបានល្អ) ដូច្នោះហើយ យើងត្រូវរៀនទទួលយកការពិតថា ក្នុងសង្គមមនុស្សយើង ជនខុសគ្នា ក្រុមខុសគ្នា តែងតែមានទស្សនៈខុសគ្នា គោលដៅខុសគ្នា និង វិធីសាស្ត្រប្រតិបត្តិខុសៗ ។

នោះគឺនិយាយឲ្យទូលាយ យើងបង្រួមមករឿងខ្មែរក្រោមវិញម្ដង ។

សព្វថ្ងៃនេះ ខ្មែរក្រោមនៅទូទាំងពិភពលោកបានបង្កើតជាក្រុម ជាពួកច្រើនណាស់ ដែលពុំងាយរ៉ាយរ៉ាប់បានអស់នោះទេ ហើយនេះជាការពិត ។

ចំពោះស្ថានភាពជាក់ស្ដែងនេះ មានបងប្អូនខ្មែរយើងជាច្រើនបានឱបក្បាល យំស្រែកថា «បែកបាក់ហើយ» ចង់ឲ្យរួបរួម ឯកភាពទៅជាមួយ ។ ហើយក៏មានជនមួយចំនួនបានគិតថា ក្រុមនេះ ក្រុមនោះ មិនមែនជាក្រុមរបស់អញ ក៏កើតក្ដីមិនសប្បាយចិត្ត ចង់ឲ្យ «ខ្មែរក្រោមទាំងពួងជ្រកក្រោមម្លប់តែមួយ» ហើយពួកគេបានតាំងខ្លួនជាអ្នកបង្រួបបង្រួមឲ្យខ្មែរក្រោមទាំងឡាយចុះចូលជាមួយនឹងក្រុមគេ ។ ជាលទ្ធផល ប្រសិនបើក្រុមណា ពួកណា ឬ ជនណាមិនព្រមក្រោមស្លាករបស់គេ គេនឹងបិទស្លាកឲ្យថា «ជនប្រឆាំង» ឬ «ជនក្បត់» ។

ឥឡូវកនយើងនិយាយមកវិញម្ដងទៀត រឿងពហុទស្សនៈ ។

ក្នុងព្រៃមានច្រើនប្រភេទឈើណាស់ ហើយក្នុងប្រភេទនីមួយៗ មានដើមឈឺច្រើនណាស់ដែល ដើមនីមួយៗកោង ត្រង់ ខ្ពស់ ទាប ស្រស់ ចាស់ ខ្ចី ខុសៗគ្នា ។ នោះហើយគេហៅថាព្រៃ ។ ក៨ដូច្នោះដែរ គំនិត «ក» គំនិត «ខ» «គំនិតក១» «គំនិត កF២៤» ។ល។ គំនិតច្រើនណាស់ ខុសៗ ប្លែកៗ ។ល។ នេះហើយ គេហៅថា «សង្គមមនុស្ស»

ខ្មែរក្រោមយើង ច្រើនក្រុមណាស់ មានក្រុមមិនខ្វល់រឿងទឹកដីទេ តែខិតខំការពារ បម្រើប្រជាជនខ្មែរក្រោមឲ្យមានការរស់នៅត្រឹមត្រូវ មានក្រុមស្វិតស្វាញការពារសិទ្ធិមនុស្សឲ្យខ្មែរក្រោម មានក្រុមនាំខ្មែរក្រោមទៅរកសិទ្ធិ «សម្រេចវាសនាខ្លួនដោយខ្លួនឯង» មានក្រុមចង់ពឹងរដ្ឋាភិបាលកម្ពុជាប្ដឹងយួនទាមទារទឹកដីមកវិញ មានក្រុមចង់វាយយួនយកទឹកដីមកវិញ មានក្រុមចង់ប្ដឹងយួន មានក្រុមចង់រស់នៅជាមួយនឹងយួន មានក្រុមសហការនឹងយួន មានក្រុមការពារយួន មានក្រុមបម្រើយួន មានក្រុមគ្មានធ្វើបានអ្វីទាំងអស់តែស្រែកឡូឡាដើម្បីមុខមាត់ មានក្រុមមិនធ្វើអ្វីតែស្រែកឡូឡាដើម្បីបានលុយចាយ ។ល។ ច្រើនណាស់ ច្រើនណាស់ រាប់មិនអស់ទេ !

ត្រូវធ្វើយ៉ាងម៉េចបង្រួបបង្រួម ឲ្យមានឯកភាពជាតិ ?

បង្រួបម្ដេចកើត ប្រសិនបើធាតុនៃសង្គមនេះគឺបែកជាស្រេចហើយនោះ ! ដូច្នោះហើយមិនចាំបាច់ចង់បានក្រុមណារលាយ ឬ ចូលមកជាមួយនឹងយើងទេ ។ ទុកឲ្យអ្វីៗកើតឡើងតាមធម្មជាតិចុះ !

តែក៏ជាច្បាប់នៃធម្មជាតិដែរ គឺ រវាងពួកដែលមានមនសិការជាតិ ចង់បម្រើជាតិពិតប្រាកដ ប្រកបដោយចំណេះដឹង សុឆន្ទៈ និង សីលធម៌ មិនអាចណាមានជម្លោះណាឡើយ មិនអាចមានទំនាស់ណាមួយឡើយ ។

គ្មានច្បាប់ណាមានយុត្តិធម៌ជាងច្បាប់ធម្មជាតិទេ អ្វីៗនៅលើលោកនេះ ឲ្យតែស្របនឹងធម៌ គឺបានគង់វង្ស និង រីកចម្រើនដោយឯកឯង ហើយអ្វីៗខុសនឹងធម្មជាតិនឹងត្រូវរលាយសាបសូន្យដោយឯកឯង ។

នរណាក៏មានសិទ្ធិដូចៗគ្នា តែសូមឲ្យចេះស្មោះត្រង់នឹងជាតិ និង ស្មោះត្រង់នឹងខ្លួនឯង អ្វីយើងធ្វើបាន និយាយចុះ ធ្វើយើងពុំទាន់ធ្វើបាន ឬ ពុំអាចធ្វើបាន កុំបំប៉ោង ។ ការបំប៉ោងរបស់ពួកអ្នកឯងអាចបង្កភាពអន្តរាយដល់ជាតិ ប៉ះពាល់ដល់អាយុជីវិតកូនចៅខ្មែរក្រោមដែលស្លូតត្រង់ ល្ងង់ ពុំសូវដឹងអី ។

សូមឲ្យស្មោះត្រង់មែនទែន ។ ប្រសិនបើធ្វើមិនបានទេ សូមជៀសឲ្យអ្នកផ្សេងធ្វើ ឬ ធ្វើការងារផ្សេងចុះ ការងារច្រើនណាស់ សូមកុំបង្អាក់ដំណើរការរបស់ជាតិខ្មែរ ។ បើមិនដូច្នោះទេ ច្បាប់ធម្មជាតិមិនលើកលែងឲ្យទេ បើមិនជឿ សាកមើល៍ !

ក្រុងភ្នំពេញ ថ្ងៃទីសូន្យប្រាំបួននៃខែកុម្ភៈរបស់ឆ្នាំពីរពាន់ដប់ប្រាំពីរ